Numbers 26

Ukubalwa kwabantu kwesibili

1Ngemva kwesifo uJehova wathi kuMosi lo-Eliyazari indodana ka-Aroni, umphristi, 2“Balani abantu bonke bako-Israyeli ngezimuli zabo bonke abaleminyaka esukela kwengamatshumi amabili kusiya phezulu yokuzalwa abangaba libutho lako-Israyeli.”

3Ngakho uMosi lo-Eliyazari umphristi batshela abantu basemagcekeni aseMowabi eduze lomfula uJodani ngaphetsheya kweJerikho bathi kubo, 4“Balani amadoda aleminyaka yokuzalwa esukela kwengamatshumi amabili kusiya phezulu, njengokulaywa kukaMosi nguJehova.” Laba ngabako-Israyeli abaphuma eGibhithe:

5Izizukulwane zikaRubheni izibulo lika-Israyeli, kwakuyilezi: uHanoki, wadabula abosendo lwama-Hanoki; uPhalu, wadabula abosendo lwama-Phalu;

6uHezironi wadabula abosendo lwamaHezironi; uKhami wadabula abosendo lwamaKhami.

7Laba babengabezinsendo zikaRubheni; inani labo laliyizi 43,730.

8Indodana kaPhalu kwakungu-Eliyabi, 9njalo amadodana ka-Eliyabi kwakungo-Nemuweli, uDathani kanye lo-Abhiramu. Bona laba oDathani lo-Abhiramu yibo ababeyizikhulu zabantu abahlamukela uMosi lo-Aroni njalo babe ngabanye babalandeli bakaKhora ngesikhathi behlamukela uJehova. 10Umhlaba wavuleka wabaginya kanye loKhora, kanye labalandeli babo abafa beqothulwe ngumlilo bengamadoda angama 250. Njalo baba yisixwayiso. 11Loba kunjalo, inzalo kaKhora kayibhubhanga yonke, yaphela.

12Izizukulwane zikaSimeyoni ngokwezinsendo zazo kwakuyilezi: uNemuweli wadabula abosendo lwamaNemuweli; uJamini wadabula abasendo lwamaJamini; uJakhini wadabula abosendo lwamaJakhini;

13UZera wadabula abosendo lwamaZera; uShawuli wadabula abosendo lwamaShawuli.

14Laba babengabezinsendo zikaSimeyoni; inani labo lalingamadoda ayizi 22,200.

15Izizukuwlane zikaGadi ngokwezinsendo zazo kwakuyilezi: uZifoni wadabula abosendo lwamaZifoni; uHagi wadabula abosendo lwamaHagi; uShuni wadabula abosendo lwamaShuni;

16u-Ozini wadabula abosendo lwamaOzini; u-Eri wadula abosendo lwama-Eri;

17u-Arodi wadabula abosendo lwamaArodi; u-Areli wadabula abosendo lwamaAreli.

18Laba bengabezinsendo zikaGadi; inani labo laliyizi 40,500.

19U-Eri lo-Onani babengamadodana kaJuda, kodwa bafela eKhenani.

20Izizukulwane zikaJuda ngokwezinsendo zazo kwakuyilezi: uShela wadabula abosendo lwamaShela; uPherezi wadabula abosendo lwamaPherezi; uZera wadabula abosendo lwamaZera.

21Izizukulwane zikaPherezi kwakuyilezi: uHezironi wadabula abosendo lwamaHezironi; uHamuli wadabula abosendo lwamaHamuli.

22Laba ngabezinsendo zikaJuda; inani labo laliyizi 76,500.

23Izizukulwane zika-Isakhari ngokwezinsendo zazo kwakuyilezi: uThola wadabula abosendo lwamaThola; uPhuwa wadabula abosendo lwamaPhuwa;

24uJashubi wadabula abosendo lwamaJashubi; uShimroni wadabula abosendo lwamaShimroni.

25Laba ngabezinsendo zika-Isakhari; inani labo laliyizi 64,300.

26Izizukulwane zikaZebhuluni ngokwezinsendo zazo kwakuyilezi: uSeredi wadabula abosendo lwamaSeredi; u-Eloni wadabula abosendo lwamaEloni; uJaliyeli wadabula abosendo lwamaJaliyeli.

27Laba ngabezinsendo zikaZebhuluni, inani labo laliyizi 60,500.

28Izizukulwane zikaJosefa ngokwezinsendo zabo bezalwa nguManase lo-Efrayimi kwakuyilezi:

29Izizukulwane zikaManase ngokwezinsendo zazo: uMakhiri wadabula abosendo lwamaMakhiri, (uMakhiri wayenguyise kaGileyadi) uGileyadi wadabula abosendo lwamaGileyadi.

30Laba yizizukulwane zikaGileyadi: u-Iyezeri wadabula abosendo lwamaIyezeri; uHeleki wadabula abosendo lwamaHeleki;

31u-Asriyeli wadabula abosendo lwama-Asriyeli; uShekemu wadabula abosendo lwama-Shekemu;

32uShemida wadabula abosendo lwama-Shemida; uHeferi wadabula abosendo lwama-Heferi.

33(UZelofehadi indodana kaHeferi wayengelamadodana; wayelamadodakazi wodwa, amabizo awo ayengomaMahila, loNowa, loHogila, loMilikha kanye loThiriza.)

34Laba kwakungabezinsendo zika-Manase; inani labo laliyizi 52,700.

35Laba kwakuyizizukulwane zika-Efrayimi ngokwezinsendo zazo: uShuthela wadabula abosendo lwamaShuthela; uBhekeri wadabula abosendo lwamaBhekeri; uThahani wadabula abosendo lwamaThahani.

36Laba kwakuyizizukulwane zikaShuthela: u-Erani wadabula abosendo lwama-Erani.

37Laba kwakungabezinsendo zika-Efrayimi; inani labo laliyizi 32,500. Laba kwakuyizizukulwane zikaJosefa ngokwezinsendo zazo.

38Izizukulwane zikaBhenjamini ngokwezinsendo zazo kwakuyilezi: uBhela wadabula abosendo lwamaBhela; u-Ashibhela wadabula abosendo lwama-Ashibhela; u-Ahirami wadabula abosendo lwama-Ahirami;

39uShufamu wadabula abosendo lwamaShufamu; uHufamu wadabula usendo lwama-Hufamu

40Izizukulwane zikaBhela ezazalwa ngu-Adi kanye loNamani yilezi: u-Adi wadabula abosendo lwama-Adi; uNamani wadabula abosendo lwamaNamani.

41Laba kwakungabezinsendo zikaBhenjamini; inani labo laliyizi 45,600.

42Laba babeyizizukulwane zikaDani ngokwezinsendo zazo: uShuhamu wadabula abosendo lwamaShuhamu. Laba babengabezinsendo zikaDani:

43Bonke babengabosendo lwamaShuhamu; njalo inani labo laliyizi 64,400.

44Izizukulwane zika-Asheri ngokwezinsendo zazo kwakuyilezi: u-Imna wadabula abosendo lwama-Imna; u-Ishivi wadabula abosendo lwama-Ishivi; uBheriya wadabula abosendo lwama-Bheriya;

45njalo izizukulwane ezadatshulwa nguBheriya yilezi: uHebheri wadabula abosendo lwamaHebheri; uMalikhiyeli wadabula abosendo lwamaMalikhiyeli.

46(U-Asheri wayelendodakazi okwakuthiwa nguSera.)

47Laba babe ngabezinsendo zika-Asheri; inani labo lalizi 53,400.

48Izizukulwane zikaNafthali ngokwezinsendo zazo kwakuyilezi: uJaziyeli wadabula abosendo lwama-Jaziyeli; uGuni wadabula abosendo lwama-Guni;

49uJezeri wadabula abosendo lwama-Jezeri; uShilemu wadabula abosendo lwama-Shilemu.

50Laba babengabezinsendo zikaNafthali; inani labo laliyizi 45,400.

51Inani lamadoda wonke ako-Israyeli laliyizi 601,730.

52UJehova wathi kuMosi, 53“Ilizwe lizakwahlukaniselwa abantu njengelifa labo kusiya ngenani lamabizo abo. 54Isizwe esikhulu uzasinika isabelo esikhulu, kuthi isizwana esincinyane usiphe isabelo esincane; isizwana ngasinye sizakwabelwa ilifa laso ngokuya ngenani lamabizo lalabo ababhaliweyo. 55Bana leqiniso lokuthi ilizwe labiwa ngenkatho. Isabelo seqembu ngalinye sizakuya ngamabizo esizwana sabokhokho baso. 56Isabelo ngasinye selizwe sizakwehlukaniswa ngokuphosa inkatho phakathi kwezizwana ezinkulu lakwezincinyane.”

57Laba ngabaLevi ababalwa kulandelwa izinsendo zabo: uGeshoni wadabula abosendo lwama-Geshoni; uKhohathi wadabula abosendo lwama-Khohathi; uMerari wadabula abosendo lwama-Merari.

58Laba labo babengabezinsendo zabaLevi: usendo lwamaLibhini, usendo lwamaHebhroni, usendo lwamaMahili, usendo lwamaMushi, usendo lwamaKhora. (UKhohathi wayengukhokho ka-Amramu;

59inkosikazi ka-Amramu kwakunguJokhebhedi, oyisizukulwane sika-Levi, owayezalelwe eGibhithe ngabaLevi. Wazala lo-Amramu u-Aroni, loMosi kanye lodadewabo uMiriyamu.

60U-Aroni wayenguyise kaNadabi lo-Abhihu, lo-Eliyazari kanye lo-Ithamari.

61Kodwa uNadabi lo-Abhihu bafa baze banikele kuJehova ngomlilo ongavunyelwayo.)

62Bonke abaLevi abesilisa ababalwayo kusukela kwabalenyanga eyodwa yokuzalwa kusiya phezulu babeyizi 23,000. Kababalwanga ndawonye labanye abako-Israyeli ngoba benganikwanga isabelo esiyilifa phakathi kwabo.

63Laba yibo ababalwa nguMosi lo-Eliyazari umphristi mhla bebala abako-Israyeli emagcekeni aseMowabi nganeno komfula iJodani malungana leJerikho.

64Kwakungekho loyedwa phakathi kwabo owayekhona mhla uMosi lo-Aroni bebala abako-Israyeli enkangala yaseSinayi. 65Ngoba uJehova wayetshilo kwabako-Israyeli labo ukuthi ngempela babezakufa enkangala, njalo kakho loyedwa wabo owasalayo ngaphandle kukaKhalebi indodana kaJefune loJoshuwa indodana kaNuni.